![](https://blogger.googleusercontent.com/img/b/R29vZ2xl/AVvXsEgtRsrJ_-wwLJE47LPQqttMjAVDX3U9n59Hw42DzA0d_mCNXdqauafHoHeZcPMDpx534GgXeb9PgaxYZybhgHGwo2pfI97IuAW-x83czUHO77EIuU9YxlmL1Zlf4MFFSFX5wzu1xjh7Dv_C/s320/ch1-123064.jpg)
Në Britani të Madhe secili qytetar do të ketë numër identifikues dhe faqe interneti, e krejt kjo me qëllim të zvogëlimit të shpenzimeve.
Sipas gazetës britanike “The Telegraph”, brenda një viti secili qytetar i Britanisë së Madhe do të ketë faqe të personalizuar të internetit për qasje në shërbimet qeveritare. Plani është pjesë e strategjisë për zvogëlimin e shpenzimeve me vendosjen e të gjitha shërbimeve publike online.
Për më tepër, gjatë tri viteve të ardhshme planifikohet nisja e shërbimeve në stil të Facebookut ku qytetarët do të mund të kontaktojnë mjekët për këshilla, apo, për shembull, të bien në kontakt me profesorët e shkollës së fëmijëve të tyre. Iniciativën e ka mbështetur edhe “shpikësi” i internetit Tim Berners-Lee i cili vlerëson se me realizimin e projektit do të kursehet shumë kohë dhe para. Gjithashtu, besohet se në të ardhmen zyrat fizike nuk do t’u nevojiten britanikëve.
Natyrisht, një propozim i këtillë nuk mund të kalojë pa kritika, prandaj janë shfaqur ata të cilët thonë se një numër i madh e njerëzve në sektorin publik do të humbasin vendet e tyre të punës. Në fakt, sipas parashikimeve gjatë 10 viteve të ardhshme do të mbyllen shumica e ofiçarive të shtetit, derisa të gjitha shërbimet do të kryhen me anë të protokolleve online. Po ashtu, mbetet pikëpyetje se si do të menaxhojnë njerëzit e moshuar me këtë shërbim.
No comments:
Post a Comment